“Azərittifaq”-Azərbaycan Mərkəzi Kooperativlər İttifaqı adlanan qurumun varlığı ilə yoxluğu bilinmir. SSRİ dövründə kənd təsərrüfatı mallarının bazara çıxarılması ilə məşğul olan ittifaqın müstəqillik illərində fəaliyyəti demək olar ki, sıfıra düşüb.

“Qafqazinfo” xəbər verir ki, “Yeni Müsavat”ın yazdığına görə, ekspertlər ölkə iqtisadi böhran yaşadığı indiki şəraitdə belə bir qurumun saxlanılmasına ehtiyac görmür. Təsadüfi deyil ki, son illər, ümumiyyətlə, “Azərittifaq” hansısa bir fəaliyyəti ilə bağlı gündəmə gəlməyib, adı mətbuatda belə keçməyib. Bu da artıq ittifaqın kağız üzərində mövcudluğu anlamına gəlir.

1993-cü ildən quruma rəhbərlik edən deputat Eldar Quliyevin ittifaqın adının yaşamasında böyük rolunun olduğu şübhəsizdir. Səlahiyyətlərindən istifadə edən deputat “Azərittifaq” adının tarixə keçməməsi üçün çarpışır. Bütün bunlara baxmayaraq, qurumun tezliklə ya fəaliyyətini dayandıracağı, ya da ləğv ediləcəyi deyilir.

İqtisadçı ekspert Qubad İbadoğlu bildirib ki, qurum özü buraxılması barədə qərar verə bilər: "“Azərittifaq”ın fəaliyyəti kooperativ amillərlə əlaqədardır. Müxtəlif sahələrdə fəaliyyət göstərirlər. Düşünmürəm ki, dövlət bu qurumu bağlamalıdır. Qurumun fəaliyyətindən narazılıq onu bağlamaq üçün əsas yaratmır. İttifaqın özünün şurası, idarə heyəti var. Qurumun buraxılması barədə onların özləri qərar verə bilərlər. “Azərittifaq” Şurasının nəzdində Azərbaycan Kooperasiya Universiteti, Bakı Biznes və Kooperasiya Kolleci var. İndi bilmirəm ki, bu kollec fəaliyyət göstərir, ya yox. Kolleclərin fəaliyyətlərində Təhsil Nazirliyinin xətti ilə müəyyən dəyişikliklər olub. Bu dəyişikliklərin ittifaqın nəzdində olan kolleclərə şamil olunub-olunmaması ilə bağlı nəsə demək çətindir. Bu qurum sovet dövründə çox əhəmiyyətli qurum olub.

O dövrdə “Azərittifaq”ın şəbəkəsi çox geniş idi. Bu qurum dövlətin nəzarətində deyil, amma tam müstəqil də deyil. Adı müstəqil olsa da, özü dövlətdən asılı fəaliyyət göstərir. Bu qurumun, açığı, fəaliyyətini izləmirəm, ona görə də tam məlumatlı deyiləm. Bildiyim odur ki, sovet dövründən bizə miras qalmış qurumdur. Kooperativlərin birliyindən söhbət gedirsə, bu, dövlət qurumu hesab olunmalıdır. İttifaqın qurultayı qərar qəbul edib fəaliyyətini dayandıra da bilər. İttifaq üzvləri əgər istəsələr, qurumun fəaliyyətini yenidən qurarlar. Bu hüquq yalnız “Azərittifaq”ın üzvlərinə və qurultaya məxsusdur.

Bu, ictimai əsaslı qurumdur, dövlət qurumu deyil ki... Dövlət büdcəsindən heç nə almırlar. Düşünürəm ki, ittifaqın fəaliyyətinin zəif olmasına səbəb ölkə iqtisadiyyatında kooperasiyanın rolunun az olmasıdır, yəni kooperativlərin sayı azdır. Əvvəl geniş şəbəkədə demək olar ki, bütün Azərbaycanı əhatə edirdilər. İndinin özündə də bu qurumun tərkibində müxtəlif regionlarda fəaliyyət göstərən kooperativlər var. Amma fəal deyillər. Sovet dövründə mərkəzləşmiş sistem var idi. İndi isə sağlam rəqabətdə “Azərittifaq”ın fəaliyyətinin zəif olmasının günahını qurumun özündə axtarmaq lazımdır".