Vəkil Elçin Sadıqov sosial şəbəkədə status yazaraq tanınmış şəxslərdən birinin cinayət işini Avropa Məhkəməsində udduğunu və həmin şəxsin ayrılan təzminatdan ona çatacaq haqqı hələ də ödəmədiyini bildirib. Statusa yazılan şərhlərdə həmin şəxsin hərbi ekspert Üzeyir Cəfərov olduğu qeyd olunub.

“Qafqazinfo” məsələ ilə bağlı adı hallanan Üzeyir Cəfərovun mövqeyini öyrənmək üçün onunla əlaqə saxlayıb.

Ü.Cəfərov belə bir problemin olduğunu təsdiqləyib, lakin özünün heç bir təqsiri və borcu olmadığını deyib: “Elçin Sadıqov hələ ki mənim adımı çəkməyib. Mənim işim üzrə onu deyim ki, nə problemləri varsa, gedib Media Hüququ İnstitutunda özləri araşdırsınlar. Nə qədər deyiblərsə, hamısı İnstituta ödənilib, aldıqlarını alıblar. Mənim Avropa Məhkəməsinə gedən işimdə Media Hüququ İnstitutu tərəfdaş olub, Elçin Sadıqovun bu işə heç bir aidiyyatı olmayıb. Avropa Məhkəməsinin qərarında da Elçin Sadıqovun adı yazılmayıb. Qərarı oxuyun, orda yazılıb ki, Elçin Sadıqova 4400 avro verilsin? Mənim işlərimi Xalid Ağaliyev görüb və işi Avropa Məhkəməsinə o göndərib. Elçin Sadıqov heç mənim Azərbaycandakı daxili məhkəmələrimdə də vəkilim olmayıb. Ali Məhkəmədə isə Rəşid Hacılı mənim vəkilim kimi çıxdı, sonra da aradan çıxdı. Dedilər, Rəşid Azərbaycandan gedib. Mən də Xalidə dedim ki, bəs pul ödəmişəm, mənim işim necə olacaq? Elçin Sadıqovun özünün mənə qaytaracağı vəsait var. Bu həm rəsmi sənədlərlə, həm də görüntülərlə öz təsdiqini tapır. Vəkil olan adamın hüquqları pozulursa, məhkəməyə müraciət etsin. Bunlar İnstitutda öz aralarında nəyisə bölə bilməyiblər. Elçin Sadıqov mənə mesaj yazıb ki, “mənim pulumu qaytar”. Qardaş, sən hüquqşünas adamsan, pul veribsən ki, istəyirsən? Mən bir dəfə Elçinin etibarını doğrultmamışdımsa, necə olur 2-ci dəfə ona etibarnamə vermişəm? Mən bilmirəm bu “hoqqa”nı hardan çıxartdılar, amma hələ ki, izləyirəm. Adım çəkiləcəyi təqdirdə, hüquqi yolla addım atılacaq”.

Vəkil Elçin Sadıqov “Qafqazinfo”ya açıqlamasında Ü.Cəfərovun iddialarına cavab verib: “Avropa Məhkəməsinin 29 yanvar 2015-ci il tarixli qərarı var, orada ərizəçi Üzeyir Cəfərovu təmsil edənlər mən və Rəşid Hacılıdır. Bununla bağlı, Üzeyir Cəfərovdan heç bir pul almamışıq. Müqavilə bağlanılıb ki, Avropa Məhkəməsində iş udulduqdan sonra bizim xidmət haqqımızı ödəyəcək. Qərarda da açıq-aşkar yazılıb ki, 4400 avro hüquq xidməti xərclərinə görə ödənilməlidir. Üzeyir Cəfərov bu günə qədər o pulu ödəməyib və 1 il əvvəl bankdan həmin vəsaiti çıxarmasına baxmayaraq bizi aldadıb, pulu almadığını deyib. Bir ay öncə də mənə etibarnamə verdi ki, həmin pulu hökümətdən tələb edim. Bu zaman ortaya çıxdı ki, 1 il əvvəl şəxsən özü pulu alıb. Mən ölkədaxili məhkəmələrdə də onun vəkili olmuşam, baş prokurora, ölkə rəhbərinə verilən şikayətlərdə yeganə vəkili mən olmuşam. Üzeyir Cəfərov Müdia Hüququ İnstitutuna ödəniş etdiyinə dair sübut təqdim etməlidir”.

E.Sadıqov Ü.Cəfərova borclu olmasına dair ittihama ironiya ilə cavab verib: “Yəqin, vəkili olduğuma görə mən ona pul ödəməliyəm”.

***

Media Hüququ İnstitutunun keçmiş koordinatoru Xalid Ağaliyev “Qafqazinfo”ya açıqlamasında adı hallanan məsələyə aydınlıq gətirib:

“Üzeyir Cəfəru 16 ildir tanıyıram, amma son 1 ildə məni aldadıb. Bu münasibətimizə görə araşdırmırdım ki, kompensasiyanı alıb ya almayıb. Bu müddət ərzində Üzeyir Cəfərov mənə və ya İnstituta 1 qəpik də pul ödəməyib. İki həftə bundan əvvələ qədər bizə həm yazıb, həm də şifahi deyib ki, pulu mən almamışam. Pulu almayıbsa, necə olur bizə ödəniş edir?”

X.Ağaliyev Ü.Cəfərovun E.Sadıqovla deyil, onunla işləməsi məsələsinə də aydınlıq gətirib: “Mən İnsitutda koordinator olmuşam, buna görə də Üzeyir Cəfərovla əlaqə saxlayıb hara getmək lazım olduğunu, nə etmək lazım olduğunu demişəm. Mən onun vəkili olmamışam. Avropa Məhkəməsində isə Elçin Sadıqov və Rəşid Hacılı rəsmən Üzeyir Cəfərovun vəkili olublar”.

Murad Əhməd