Arif Əsgərov 48 milyonluq qalmaqaldan danışdı

arif-esgerov-48-milyonluq-qalmaqaldan-danisdi
Oxunma sayı: 3119

Keçmiş Nəqliyyat naziri Ziya Məmmədovun müavini Arif Əsgərovun istintaqa çağrıldığı və həbsinə hazırlıq getməsi ilə bağlı münasibətlərə aydınlıq gətirilib.

Qafqazinfo” xəbər verir ki, məsələ ilə bağlı Unikal.org-a açıqlama verən A.Əsgərov deyib ki, onu istintaqa çağırmayıblar: “İstintaqa çağrılmamışam. Bu nə xəbərdir yazılıb? Bu cür söz-söhbətlərin əsası yoxdur”.

Sabiq nazir müavini vaxtilə "Azərbaycan Dəmir Yolları” Qapalı Səhmdar Cəmiyyətinin (QSC) marketinq şöbəsinin rəisi olmuş, baldızı oğlu Rahib Hüseynovun 48 milyonluq mənimsəmədə ittiham olunaraq həbs edilməsinə də münasibət bildirib: “Bununla bağlı istintaq gedir. İstintaq məsələ ilə bağlı öz sözünü deyəcək. Mən nə deyə bilərəm ki? İstintaqda adigedən şəxs mənim qohumumdur. Amma bu məsələnin mənə heç bir aidiyyatı yoxdur”.

Qeyd edək ki, “Yeni Müsavat”ın yazdığına görə, Arif Əsgərovun QSC-yə rəhbərlik etdiyi vaxt böyük maliyyə qalmaqalı üzündən 2013-cü ildə onun həbs ediləcəyi də gözlənilirmiş. Həmin il QSC-də külli miqdarda, daha dəqiq desək, 48 milyonluq yeyinti faktı aşkarlanıb.