Azərbaycan baş prokurorunun birinci müavini Rüstəm Usubov 20 yanvar hadisələri ilə bağlı açılan cinayət işinin gedişatı barədə danışıb.

“Qafqazinfo”nun verdiyi xəbərə görə, R.Usubov deyib ki, SSRİ-nin keçmiş prezidenti Mixail Qorbaçov Konstitusiyanı kobud şəkildə pozaraq hərbçilərin Bakıya yeridilməsi ilə bağlı qanunsuz fərman verib: “Hərbçilər yanvarın 19-u saat 00:00-dan başlayaraq şəhərə daxil oldular və dinc əhalini qırdılar.

Hadisə nəticəsində Bakı əhalisindən 132 nəfər qətlə yetirilib, 612 nəfər yaralanıb, 814 nəfər qanunsuz həbs olunub. Azərbaycan Televiziyasının enerji blokunun partladılması Azərbaycanın DTK-nin o vaxtki rəhbəri Vaqif Hüseynov və Moskvadan gələn nümayəndələrin təşkilatçılığı ilə baş tutub.

O vaxt işi Rusiya prokurorluğu aparırdı. Azərbaycan prokurorluğu cinayət işini 1992-ci il fevralın 14-də başladıb, bu da o vaxtki rəhbərliyin səhvidir. İki ildən sonra istintaq aparılması çox çətin idi. Çünki müəyyən sübutlar aradan qaldırılmışdı, yenidən dindirilmə aparmaq çox çətin idi. İstintaq hərəkətləri həm burda, həm Moskvada aparıldı. SSRİ Mərkəzi Komitəsinin yanvarın 19-da Bakıya ezam olunan rəhbər işçiləri dindirilib. Ancaq Qorbaçovu və Bakatini dindirmək mümkün olmadı. O, qaçıb gizləndi. Girenko, Babkov, Mixaylov, Yazov dindirildilər. Qorbaçov istintaqdan yayındı. 1992-ci ildə 68 cild əsas işi bizə verilmədi. İndiyə qədər Azərbaycan prokurorluğu 68 cild işi tələb edir, amma onlar bizə çatdırılmayıb. İstintaq gedir, 68 cild iş istintaqa gələndən sonra ona tam qiymət verilib məhkəməyə təqdim olunacaq”.

Murad Əhməd