ATƏT PA-nın Cənubi Qafqaz üzrə yeni təyinatı
Kristian Vigen ATƏT PA-nın Cənubi Qafqaz üzrə yeni xüsusi nümayəndəsi təyin olunub.
“Qafqazinfo” xəbər verir ki, Milli Məclisin mətbuat xidmətindən Trend-ə verilən məlumata görə, bu barədə ATƏT Parlament Assambleyasının baş katibi Roberto Montellanın Milli Məclisin qurumdakı nümayəndə heyətinin rəhbəri Bahar Muradovaya ünvanladığı təşəkkür məktubunda deyilir.
Məktubda onun təşkilatda baş katib kimi yüksək vəzifəyə seçilməsi münasibətilə təbrikə görə minnətdarlıq bildirilir, bu vəzifədə nümayəndə heyətinə, eləcə də qurumun bütün üzvlərinə dəstək olacağı ifadə olunur.
Təşəkkür məktubunda bildirilir ki, təşkilatın sədri İlkka Kanerva tərəfindən bu yaxınlarda Kristian Vigenin Assambleyanın Cənubi Qafqaz üzrə xüsusi nümayəndəsi təyin olunub. Baş katib yeni nümayəndənin region üçün mühüm əhəmiyyət daşıyan məsələlərin həllində səylərini əsirgəməyəcəyinə və bu işi daha da canlandıracağına əminliyini ifadə edir.
