“Bu adam heç pul yeyənə oxşayır?” - “Rabitə işi”+Yenilənib

bu-adam-hec-pul-yeyene-oxsayir-
Oxunma sayı: 13131

Bu gün Bakı Ağır Cinayətlər Məhkəməsində Rabitə Nazirliyinin sabiq aparat rəhbəri Vidadi Zeynalov və digər yüksək vəzifəli şəxslərinin cinayət işi üzrə məhkəmə prosesi davam etdirilib.

Qafqazinfo”nun prosesdə iştirak edən əməkdaşının verdiyi xəbərə görə, hakim Əfqan Hacıyevin sədrliyi keçirilən prosesdə təqsirləndirilən şəxslər ifadə veriblər.

“Optik Rabitə, Tikinti və Quraşdırma” MMC-nin direktoru Namazəli Məmmədov ifadə verərək deyib ki, 1997-ci ildəb sahibkarlıqla məşğuldur: "Bizə qarşı açılan cinayət işinin istintaqı zamanı bəlli olur ki, biz tenderlər və katirovka sorğularında qiymətləri şişirtmişik. Biz qanuna uyğun olaraq işləmişik. İstintaqa görə, mənim "Aztelekom"dan 16 milyon alacağım var, 4 milyon da mənimsəmişəm. Mənimsədiyim pullar mənə ödəniləcək pullardan silinsə, hələ yenə də alacağım qalır. Onda niyə həbs olunmuşam?

Maliyyə Nazirliyi hesablaşmaları 1991-ci ilin bais qiymətlərinə uyğun hesablayır. Bu gün isə qiymətlər 2-3 dəfə bahalaşıb. Buna görə də istintaqda hesablamalar səhv aparılır. Bakıdakı bütün kameraları biz çəkmişik. Mən 16 milyon manat pulumu dövlətdən ala bilmirəm. Vidadi Zeynalova əlavə paketdə pul verməmişik. Müsahibimə də hər ay maaşdan əlavə 400 manat verməmişəm. Mən belə ifadə verməmişəm. Bəzən müsahibimizin uşağı xəstə olanda əlavə pul verirdim. Şəxsi pulum idi, özüm bilərdim kimə verirəm".

Hakim bildirib ki, N.Məmmədova 4 yox, 12 milyon manat mənimsə ittihamı verilib: "İttihama görə, siz 12 milyon manatın 4 milyonunu özünüzə götürmüsüz".

N.Məmmədov deyib ki, Vidadi Zeynalovla bağ qonşusu olub, Məhəmməd Məmmədovu isə 1988-ci ildən BTRİB-də işlədiyi vaxtdan tanıyır.

N.Məmmədov digər təqsirləndirilən və nisbətən arıq olan Səhrab Hümbətovu göstərərək "Xahiş edirəm, buna baxın, bu adam heç pul yeyənə oxşuyur?" deyib.

Təqsirləndirilən Cəlil Cəfərov ifadə verərək deyib ki, hər ay paket formasında maaş ayırıb: "Rabitə" Voleybol klubunun prezidenti idim. Biz Bakıda keçirilən beynəlxalq yarışlarda, həmçinin Avropa Oyunlarında yüksək səviyyədə işləmişik, mükafatlandırılmışıq da. Biz həbs olunandan sonra "Rabitə" Voleybol Klubu da dağıldı. Azərbaycan interneti üçün beynəlxalq kanalı Rusiya üzərindən alırdıq, onlar monopoliya qurmuşdular, bizi kənara çıxmağa buraxmırdılar.

Biz Almaniyadan kanala qoşulduq və qiyməti 10 sentdən 2 sentə endirdik, xərclər 300 milyon azaldı. Naxçıvan da blokadadaydı, ora ilə danışmaq mümkün deyildi. Orada yüksək vəzifədə olan dostum vasitəsilə İranla anlaşma əldə etdik, xüsusi tariflə roaminq açıldı və Naxçıvana optik açıldı. Həmin vaxt heç "Azərcell", "Bakcell" və "Nar Mobile"ın İranda roaminqi yox idi. Mən bütün işlərimi qanunlara uyğun olaraq aparmışam. Nazirliyin rəhbərliyinin tapşırıqlarını yerinə yetirmişəm. İttiham aktında qeyd edilib ki, "Rostelekom" guya daha aşağı qiymətlər təklif edib. Orada cinayətkarlıq baş alıb gedirdi, bunu MTN də araşdırmışdı.
Mağazalara pulsuz aparat verirdilər ki, guya wifi gücləndirilir. Həmin aparatları açanda qapaqda xüsusi hissə vardı, orada mobil nömrə yerləşdirdilər. Yəni, mini mobil operator yaradərdılar. Sonra onun üzərindən insanlara zəng edirdilər. Həmin vaxt insanlara beynəlxalq nömrələrdən zəng gəlirdi, araşdıranda görünürdü ki, yerli nömrədir. Onlar elə peşəkar oğurluq edirdi ki, heç qeydiyyata da düşmürdü. Biz bunlarla mübarizə aparırdıq. MTN də bizi sıxışdırırdı. Çünki terrorist də belə zəng edə biıərdi.

Burda əsas dövlətin təhlükəsizliyi məsələsidir. Bizim işlər daha keyfiyyətli idi. Biz tutulandan sonra yenə də bunlar ortaya çıxdı və indi daha çoxdu. Heç bir qayda pozuntusuna da yol verməmişik. Biz müqavilə bağladığımız şirkətin də kimlərin olduğu bəllidir. "Azİntelekom"a hər ay 300 min, mənə 50 min manat verilən paket məsələsini "Cartburq" şirkətindən soruşdum, dedilər bu, yuxarılarla razılaşdırılıb, paketi nazirliyin aparatında da, rəhbərliyində də verirdilər. Mənim həmin pulub mənbəyini soruşmaq ixtiyarım yox idi. Poçt şirkəti "PSG" ilə müqavilə bağlanması da nazirlik rəhbərliyinin öz seçimi idi. Mənə göstəriş verildi ki, bu şirkətlə işlə, çünki daha keyfiyyətli idi. Buna görə Vidadi Zeynalov mənə 1 qəpik də verməyib. Aylıq paketləri isə nazirin göstərişi ilə əvvəldən də alırdım.

Nazir Əli Abbasov əvvəl deyirdi paketi aparat rəhbərindən al, sonra deyirdi aldığın puldan bir hissəsini aparat rəhbərinə ver, qalanını özünə götür. Mən də belə edirdim. "Cartburq" şirkətinin kimə məxsus olmasını bilirdim, lakin bunun məsələyə aidiyyatı yox idi. Bilirsiniz ki, həmin vaxt mənim səsimi çıxarmağım da mümkün deyildi. Qanunsuz zənglərlə bağlı sabiq nazir Eldar Mahmudovla da danışıqlar aparılmışdı".

Prosesdə fasilə elan olunub.

***

Fasilədən sonra Cəlil Cəfərov sualları cavablandırıb. O, V.Zeynalovdan sabiq nazir Əli Abbasovun göstərişi ilə hər ay “Rabitə” Voleybol klubu üçün 50 min manat alıb: “O pulu özümçün alsaydım indi mənim də bağım, evim olardı. Voleybol işindən dəfələrlə uzaqlaşmaq istəsəm də, nazir icazə vermədi”.

C.Cəlilov deyib ki, Mahmudovların şirkəti olan “Cartburg NC” şirkəti ilə işləmək tapşırığını Əli Abbasov verib: “İşin keyfiyyətinə də özü nəzarət edirdi. Mənə deyirdi ki, kibercinayətkarlığın qarşısını almaqda bizə MTN böyük dəstəyi lazımdır. Buna görə də həmin şirkətlə işlədik. Hər ay onların işçisi Elmar Hüseynov gətirib pul verirdi. Klub üçün 50 min, data sistem üçün 29 min götürüb, qalan 300 min dolları Vidadi Zeynalova verirdim.

"Azərpoçt" MMC-in sabiq baş direktoru Qəmbər Bəybalayev ifadə verərək deyib ki, Əli Abbasov paket sistemi ilə maaş verilməsini təklif edəndə buna etiraz edib: “Mən maaşların qaldırılmasını təklif etdim, o da mərkəzi aparatın işçilərinin maaşını 1000 manat artırdı. Mənim tabeliyimdə olan 74 idarə rəisinə paket verilib, lakin mən heç vaxt bu işə qarışmamışam. Mənim adıma milyonluq mənimsəmələr yazıblar, amma cəmi 1 mərtəbəli evim var. Mən qanun çərçivəsində işləmişəm”.

Məhkəmə prosesi dekabrın 7-də davam etdiriləcək.

Qeyd edək ki, "Cartburq" şirkəti sabiq milli təhlükəsizlik naziri Eldar Mahmudovun oğlu Anar Mahmudovun olub. Şirkəti A.Mahmudovun dostu Ayaz Kərimov idarə edib.

Murad Əhməd