Dollar “qara bazar”da niyə ucuzdur?

dollar-qara-bazarda-niye-ucuzdur
Oxunma sayı: 8116

İqtisadçı ekspert Rəşad Həsənov “qara bazar”da dolların banklara nisbətən daha ucuz satılmasının səbəblərindən danışıb.

İqtisadçı “Qafqazinfo”ya açıqlamasında bildirib ki, bu, valyuta bazarı iştirakçılarında yaranan qənaətdən irəli gəlir: “Bazar iştirakçılarının çoxunda bu fikir formalaşıb ki, təxminən hökumət məzənnəni 1 dollar - 2 manat səviyyəsinə yüksəltdikdən sonra tarazlaşdırma aparacaq. Yəni, bundan sonrakı dövrdə manatın dəyərsizləşməsi prosesi təxminən 3-4 faiz arasında olacaq və ondan sonra dayanacaq. Bu baxımdan da əvvəlki dövrlərdə ucuz qiymətə yığılmış valyuta bu gün hazırda biznes subyektləri, vətəndaşlar, hətta “qara bazar”da professional mübadilə əməliyyatları ilə məşğul olan şəxslər tərəfindən təklif olunmağa başlayıb.

Bunun nəticəsində də hazırda müəyyən olunmuş məzənnədən aşağı bəzi hallarda dolları “qara bazar”dan tapmaq olmur. Bu proses uzun müddət çəkməyəcək. 1 neçə gün ərzində təxminən hazırkı templə davam edərsə, hökumət 2 manatlıq limitə rəsmi məzənnəni çatdıracaq. Bundan sonra baş verəcək məzənnə dinamikasına uyğun olaraq vəziyyət gərginləşəcək. Əgər 1 dollar psixoloji hədd sayılan iki manatı keçərsə, bu zaman “qara bazar” da valyutanın mübadilə qiyməti kəskin şəkildə yenidən artacaq. Əgər əks trend müşayiət olunarsa, qeyd olunan situasiyanın bir neçə həftə də davam etməsi mümkündür”.

Onun sözlərinə görə, əvvəlki dövrlərdə bankların “qara bazar”da iştirakçılığı var idi: “Ola bilsin ki, müəyyən banklar “qara bazar”da öz mövqeyini qorumağa çalışır. Amma düşünmürəm ki, hazırda bu ehtimal yüksəkdir. Hazırda “qara bazar”da təklif daha çox vətəndaş, biznes, o cümlədən də illeqal formada valyuta mübadiləsi ilə məşğul olan şəxslərdə bu günə qədər formalaşmış yığınlardan qaynaqlanır”.

Qeyd edək ki, hazırda “qara bazar” da dollar 1.92 səviyyəsində satılır. Banklarda isə dolların satışı 1.97 səviyyəsind formalaşıb.

Günel Türksoy